*ತುಳಸೀ - ಒಂದು ಚಿಂತನೆ*

 *ತುಳಸೀ - ಒಂದು ಚಿಂತನೆ*

(ಒದಲೇಬೇಕಾದ ಒಂದು ಲೇಖನ)

ಇಂದು ತುಳಸೀಪೂಜೆ. ನಾಳೆ ತುಳಸೀದೇವಿ ಹಾಗೂ ದಾಮೋದರ ರೂಪಿ ಕೃಷ್ಣನ ವಿವಾಹ. ಸೌಭಾಗ್ಯ ಸಮೃದ್ಧಿ ಸತ್ಸಂತತಿ ಸೌಮಾಂಗಲ್ಯಕ್ಕಾಗಿ ಮಾಡುವ ಒಂದು ಉತ್ತಮ ಉತ್ಸವ. 

*ತುಳಸಿಯಲ್ಲಿ ಅಧಿಷ್ಠಿತ ದೇವತೆಗಳು*

ಯನ್ಮೂಲೇ ಸರ್ವತೀರ್ಥಾನಿ ಯನ್ಮಧ್ಯೇ ಸರ್ವ ದೇವತಾ: |

ಯದಗ್ರೇ ಸರ್ವವೇದಾಶ್ಚ ತುಲಸಿ ತ್ವಾಂ ನಮಾಮ್ಯಹಂ ||

ಯಾವ ವೃಕ್ಷದ ಮೂಲದಲ್ಲಿ ಗಂಗಾದಿ ಸಕಲ ತೀರ್ಥಗಳ ಸನ್ನಿಧಿ ಇದೆಯೋ, ಯಾವ ವೃಕ್ಷದ  ಮಧ್ಯಭಾಗದಿ ಎಲ್ಲ ದೆವತೆಗಳು ನೆಲೆಸಿದ್ದಾರೆಯೋ, ಯಾವ ವೃಕ್ಷದ ಅಗ್ರಭಾಗದ ದಲಗಳಲ್ಲಿ ಸರ್ವ ವೇದಗಳು ಇವೆಯೋ ಅಂತಹ ಅಂತಹ ಉತ್ತಮ ವೃಕ್ಷ ಎಂದರೆ  *ತುಲಸೀ ವೃಕ್ಷ*  ಅದಕ್ಕೇನೇ ತುಲಸೀ ಶ್ರೀಕೃಷ್ಣನಿಗೆ ಅತಿಪ್ರಿಯಳು. 

*ಪುರಾಣದ ದೃಷ್ಟಿಯಲ್ಲಿ ತುಳಸೀ...*

ಪಾಪಾನಿ ಯಾನಿ ರವಿಸೂನುಪದಸ್ಥಿತಾನಿಗೋ ಬ್ರಹ್ಮ ಪಿತೃ ಮಾತೃ ವಧಾದಿಕಾನಿ | ನಶ್ಯಂತಿ ತಾನಿ ತುಲಸೀವಮ ದರ್ಶನೇನ ಗೋಕೋಟಿದಾನ ಸದೃಶಂ ಫಲಮಾಪ್ನುವಂತಿ ||

ಗೋ ವಧ, ಪಿತೃಮಾತೃ ಗುರುವಧ, ಬ್ರಾಹ್ಮಣವಧ, ಇವೆ ಮೊದಲಾದ ಕೋಟಿ ಕೋಟಿ  ಪಾಪಗಳು ನರಕದಲ್ಲಿ ಇವೆಯೋ ಆ ಎಲ್ಲ ಪಾಪಗಳು, ಪಾಪಕ್ಕೆ ಕಾರಣವಾದ ದುಃಖ ಕಷ್ಟಗಳೂ ತುಳಸಿಯ ದರ್ಶನದಿಂದ ಪರಿಹಾರವಾಗುತ್ತವೆ. ಅಷ್ಟೇ ಅಲ್ಲದೇ ನೂರುಕೋಟಿ ಗೋಗಳನ್ನು ಆಕಳನ್ನು ದಾನಮಾಡಿದರೇನು ಫಲವಿದೆ ಆ ಫಲ ತುಳಸಿಯ ದರ್ಶನದಿಂದ ಬರುತ್ತದೆ. 

*ಶ್ರೀವಾದಿರಾಜರ ಒಂದು ಕೃತಿ*

"ಒಂದು ಪ್ರದಕ್ಷಿಣವನು ಮಾಡಿದವರ ಪೊಂದುಪುದು ಭೂಪ್ರದಕ್ಷಿಣ ಪುಣ್ಯ ಎಂದೆಂದಿವಳ ಸೇವಿಪ ನರರಿಗೆ ಇಂದಿರೆಯರಸ ಕೈವಲ್ಯವೀವ ||" 

ತುಳಸೀಗೆ ಮಾಡಿ ಒಂದು ಪ್ರದಕ್ಷಿಣೆ ಸಮಗ್ರ ಭೂಮಿಗೇ ಪ್ರದಕ್ಷಿಣಿ ಹಾಗಿದ ಪುಣ್ಯ ಬರತ್ತೆ ಎಂದು ವಾದಿರಾಜರು ಕೊಂಡಾಡುತ್ತಾರೆ. 

*ಪುರಂದರ ದಾಸರ ಒಂದು ಕೃತಿ*

"ಎಲ್ಲಿ ತುಳಸಿಯ ವನವು ಅಲ್ಲೊಪ್ಪುವರು ಸಿರಿನಾರಾಯಣನು ||ಪ ||

ಗಂಗೆ ಯಮುನೆ ಗೋದಾವರಿ ಕಾವೇರಿ ಕಂಗೊಳಿಸುವ ಮಣಿಕರ್ಣಿಕೆಯು |  ತುಂಗಭದ್ರೆ ಕೃಷ್ಣವೇಣಿತೀರ್ಥಗಳೆಲ್ಲ ಸಂಗಡಿಸುತ ವೃಕ್ಷಮೂಲದಲ್ಲಿರುವುವು | ೧ ||

ಸರಸಿಜಭವ ಸುರಪ ಪಾವಕ ಚಂದಿರ ಸೂರ್ಯ ಮೊದಲಾದವರು |ಸಿರಿರಮಣನ ಆಜ್ಞೆಯಲಿ ಅಗಲದಂತೆ ತರುಮದ್ಯದೊಳು ನಿತ್ಯನೆಲೆಸಿಪ್ಪರು | ೨ ||

ಋಗ್ವೇದ ಯಜುರ್ವೇದ ಸಾಮ ಅಥರ್ವಣ ಅಗ್ಗಳಿಸಿ ವೇದ ಘೋಷಗಳು | ಅಗ್ರಭಾಗದಲಿದೆ ಬೆಟ್ಟದೊಡೆಯನು ಅಲ್ಲಿ ಶೀಘ್ರದಿ ಒಲಿದ ಶ್ರೀಪುರಂದರವಿಠಲ | ೩ ||

*ಪುರಂದರ ದಾಸರ ದೃಷ್ಟಿಯಲ್ಲಿ ಮತ್ತೊಂದು ಮಹಿಮೆ*

ವೃಂದಾವನವೆ ಮಂದಿರವಾಗಿಹ ಇಂದಿರೆ ಶ್ರೀ ತುಳಸಿ || ಪ ||ನಂದನಂದನ ಮುಕುಂದಗೆ ಪ್ರಿಯಳಾದ ಚಂದದ ಶ್ರೀ ತುಳಸೀ || ಅ.ಪ ||

ತುಳಸಿಯ ವನದಲಿ ಹರಿ ಇಹನೆಂಬುದ ಶ್ರುತಿ ಸಾರುತಿದೆ ಕೇಳಿ    ತುಳಸಿ ದರ್ಶನದಿಂದ ದುರಿತಗಳೆಲ್ಲವೂ ದೂರವಾಗುವುವು ಕೇಳಿ |ತುಳಸಿ ಸ್ಪರ್ಶವ ಮಾಡೆ ದೇಹ ಪಾವನವೆಂದು ತಿಳಿದುದಿಲ್ಲವೆ ಪೇಳಿ ತುಳಸಿ ಸ್ಮರಣೆ ಮಾಡಿ ಸಕಲೇಷ್ಟವ ಪಡೆದು ಸುಖದಲಿ ಬಾಳಿ ನೀವು || ೧ ||

ಮೂಲ ಮೃತ್ತಿಕೆಯನು ಮುಖದಲಿ ಧರಿಸಲು ಮೂರ್ಲೋಕ ವಶವಹುದು  ಮಾಲೆ ಕೊರಳಲ್ಲಿಟ್ಟ ಮನುಜಗೆ ಮುಕ್ತಿಯ ಮಾರ್ಗವ ತೋರುವುದು | ಕಾಲಕಾಲಗಳಲ್ಲಿ ಮಾಡುವ ದುಷ್ಕರ್ಮ ಕಳೆದು ಬಿಸಾಡುವುದು  ಕಾಲನ ದೂತರ ಕಳಚಿ ಕೈವಲ್ಯದ ಲೀಲೆಯ ತೋರುವುದು || ೨ ||

ಧರೆಯೊಳು ಸುಜನರ ಮರೆಯದೆ ಸಲಹುವ ವರಲಕ್ಷ್ಮೀ ಶ್ರೀ ತುಳಸಿ ಪರಮಭಕ್ತರ ಘೋರಪಾಪಗಳನು ತರಿದು ಪಾವನ ಮಾಡುವ ಶ್ರೀ ತುಳಸಿ | ಸಿರಿ ಆಯು ಪುತ್ರಾದಿ ಸಂಪದಗಳನಿತ್ತು ಹರುಷಗೊಳಿಪ ತುಳಸಿಪುರಂದರವಿಠಲನ ಚರಣ ಕಮಲವ ಸ್ಮರಣೆ ಕೊಡುವಳು ತುಳಸಿ ||

ತುಳಸಿಯ ದರ್ಶನ, ಸ್ಪರ್ಶನ, ಸ್ಮರಣೆ, ಧಾರಣ, ವಂದನ, ಉಪಾಸನೆ, ಮುಂತಾದವುಗಳಿಂದ ಶ್ರೀಹರಿಯು ಒಲಿವನೆಂದು ಹೇಳುತ್ತಾರೆ. ಈ ಹಾಡಿನ ಅರ್ಥ ವನ್ನು ತಿಳಿದಾಗ ತುಳಸಿಯಲ್ಲಿ ಭಕ್ತಿ ಮೂರ್ಮಡಿಯಾಗಿ ಅಭಿವೃದ್ಧಿಸುತ್ತದೆ. 

*ವಿಜಯದಾಸರ ದೃಷ್ಟಿಯಲ್ಲಿ ತುಳಸೀ...*

ಉದಯಕಾಲದೊಳೆದ್ದು ಆವನಾದರೂ ತನ್ನ ಹೃದಯ ನಿರ್ಮಲನಾಗಿ ಭಕುತಿ ಪೂರ್ವಕದಿಂದ, ಸದಮಲಾ ತುಳಸಿಯನು ಸ್ತೋತ್ರ ಮಾಡಿದ ಕ್ಷಣಕೆ ಮದ- ಗರ್ವ ಪರಿಹಾರವೂ,ಇದೆ ತುಳಸಿ ಸೇವಿಸಲು ಪೂರ್ವದಲಿ ಕಾವೇರಿನದಿಯ ತೀರದಲ್ಲೊಬ್ಬ ಭೂಸುರ ಪದಕೆ ಪೋದ, ಪದಪದೆಗೆ ಸಿರಿ ವಿಜಯವಿಠಲಗೆ

ಪ್ರಿಯಳಾದ ಮದನತೇಜಳ ಭಜಿಸಿರಯ್ಯಾ ||

*ತುಳಸಿಯಾ ಸೇವಿಸೀ* ಎಂಬ ಪದದಲ್ಲಿ ಮನೋ ಶುದ್ಧಿಯಿಂದ ತುಲಸಿಯನ್ನು ಸೇವಿಸಿದವರಿಗೆ ಅಹಂಕಾರ ಮಮಕಾರ ಮೊದಲಾದ ಎಲ್ಲ ದುರ್ಗುಣಗಳ ಪರಿಹಾರವಿದೆ.  ಎಂದು ವಿಜಯದಾಸರು ಸ್ಪಷ್ಟವಾಗಿ ತಿಳಿಸಿಕೊಡುತ್ತಾರೆ.

*ಜಗನ್ನಾಥದಾಸರ ದೃಷ್ಟಿಯಲ್ಲಿ...*

*ಮೂರೆರಡು ಸಾವಿರದ ಮೇಲ ಮುನ್ನೂರು ಹದಿನೇಳು ಎನಿಪ ಶ್ರೀತುಳಸೀದಳದಿ*

32317 ರೂಪಗಳಿಂದ ಸ್ವಯಂ ಶ್ರೀಕೃಷ್ಣ ತುಳಸಿಯಲ್ಲಿ ನೆಲೆನಿಂತಿದ್ದಾನೆ ಎಂದು ತಿಳಿಸಿಕೊಡುತ್ತಾರೆ. 

*ತುಳಸಿಯಿಲ್ಲದ ಪೂಜೆ ಒಲ್ಲನೋ ತಾ ಕೊಳ್ಲನೋ..*

ಇಷ್ಟೆಲ್ಲ ಮಹಿಮೆ ಇರುವದರಿಂದಲೇ ದೇವರು ತುಳಸೀ ಇಲ್ಲದ ಪೂಜೆ ನಾನೊಲ್ಲೆ, ನಾ ಸ್ವೀಕರಿಸುವದಿಲ್ಲ ಎಂದು ಸ್ಷ್ಟವಾಗಿ ಹೇಳಿಬಿಟ್ಟ. ಆದ್ದರಿಂದಲೇ ಏನೆಲ್ಲ ಸಾಧನ ಸಲಕರಣೆಗಳಿದ್ದರೂ ತುಳಸಿ ಇಲ್ಲದೆ ಪೂಜೆ ಯಾರೂ ಮಾಡುವದಿಲ್ಲ. 

*ಶುದ್ಧಿಪ್ರದಾ - ಆರೋಗ್ಯ ಪ್ರದಾ*

ನೈವೇದ್ಯ ದಾನದ ವಸ್ತು ನೀರು ಮೊದಲುಮಾಡಿ ಯಾವುದೇ ವಸ್ತು ಶುದ್ಧಿ ಆಗಬೇಕಾದರೆ ತುಳಸೀ ಇರಬೇಕು. ಸೇವಿಸುವ ಪದಾರ್ಥಗಳಿಂದ ರೋಗ ಬರಬಾರದಾಗಿದ್ದರೆ ಆ ಪದಾರ್ಥಗಳಲ್ಲಿ ತುಳಸೀ ಇರಲೇಬೇಕು. 

ಹೀಗೆ ತುಳಸೀದೇವಿಯ ಮಹಿಮೆ ಹೇಳಲು ಬರೆಯಲು ಕುಳಿತರೆ ಮುಗಿಯುವದೇ ಇಲ್ಲ. *ಓದುವ ತಮಗೆ ಖಂಡಿತ ಬೇಸರ ಬರತ್ತೆ* ಎಂದೇ ತಿಳಿದು ಇಲ್ಲಿಗೆ ಮುಗಿಸುವೆ.

ಪುರುಷರು ಎದ್ದಕೂಡಲೆ ನಿತ್ಯ ತುಳಸೀ ದರ್ಶನಮಾಡಿಕೊಳ್ಳಲಿ. ಮೃತ್ತಿಕೆ ಧರಿಸಲಿ. ದೇವರಿಗೆ ನಾಲ್ಕು ದಳವಾದರೂ ಎರಿಸುವಂತಾಗಲಿ. ಸ್ತ್ರೀಯರೆಲ್ಲರೂ ನಿತ್ಯವೂ ತುಳಸಿಯ ವೃಂದಾವನವನ್ನು ಸಿಂಗರಿಸಲಿ. ತುಳಸಿಗೆ ನೀರುಹಾಕಿ ಪೂಜಿಸಲಿ. ಇಬ್ಬರೂ ತುಳಸಿಯ ಅನುಗ್ರಹಕ್ಕೆ ಪಾತ್ರರಾಗಲಿ..

*✍🏽✍🏽ನ್ಯಾಸ....*

ಗೋಪಾಲದಾಸ.

ವಿಜಯಾಶ್ರಮ, ಸಿರವಾರ.